header

Hadook-An Husi Dezastre, Suku Lahane ho Bidau Santa-Ana Sempre Halo Aviza ba Komunidade

DILI, 07 janeiru 2020 (TATOLI) – Autoridade Suku Lahane ho Suku Bidau Santa-Ana, kontinua halo aviza ba nia komunidade iha suku laran atu ‘matan moris no neon nain’ ba dezastre naturaís (inundasaun ho anin boot) ne’ebé bele akontese bainhira de’it durante tempu udan, tinan ne’e.

Tuir previzaun tempu husi Diresaun Nasionál Meteorolojia Jeofízika (DNMG-sigla portugés) katak iha Timor-Leste sei akontese udan boot, anin no mós rai nakdoko. Tanba ne’e, Xefe Suku Lahane Osidentál, Francisco Ribeiro Smith, ho Xefe Suku Bidau Santa-Ana, João Paulo de Andrade, sempre halo alarma ba nia komunidade sira, liu-liu hirak ne’ebé hela iha area risku dezastre naturaís atu kuidadu nafatin.

“Hirak ne’ebé  hela iha mota ninin no foho lolon tenke kuidadu,”  hateten Francisco Ribeiro Smith ho João Paulo de Andrade, bainhira jornalista TATOLI halo entrevista ho sira iha ida-idak nia servisu fatin iha Dili, tersa (07/01/2020).

Foin lalais ne’e, komunidade Suku Lahane Osidentál balun sofre rai halai maibé la hamosu vítima no Ministériu Obras Públiku (MOP) halo kedas medida.

Xefe Suku Bidau Santa-Ana, João Paulo de Andrade,  sujere atu komunidade sira   labele soe fo’er ba mota laran  no labele soe fo’er arbiru.

Jornalista : Osória Marques

Editór       : Francisco Simões